Sunday, 7 October 2018
Mass readings in Scots: Twenty-seventh Sunday of the Year (Year B)
Mark 10: 2-16
And the Pharisees cam nar till him, and they wad ken, “Is it lawfu’ for a man to pit awa a wife?” tempin him. And answerin them, quo’ he, “What dis Moses commaun?” And they said, “Moses allooed a writin o’ divorce, and to put her awa.” But Jesus answer’t, “Anent the hardness o’ yere hearts, he wrate ye this commaun. But frae the first o’ the creation, God formed them male and female. And fore-anent this sal a man lea' his faither and his mither, and cling till his wife: and they twa sal be ae flesh: sae are they nae mair twa, but ae flesh. Whasae, than, God has joined thegither let-na man pit sindry!” And whan they war within again, the disciples speir’t at him anent it. And he says to them, “Whasae pits awa his wife, and take anither, commits adultery against his wife. And gin a woman divorces her husband, and taks anither, she commits adultery.”
And they war bringin till him bairns, that he soud touch them; but the disciples challenged them that brocht them. But when Jesus saw it, he was unco displeased, and said to them, “Lat the wee anes come to me: hinner-them-na: for o’ siccan anes is the kingdom o’ God! Truly say I t’ye, whasae taks-na till him the kingdom o’ God as a wee bairn, he’se in naegate comin in!” And he clippit them up in his airms, and socht blessings on them, and pat his hauns on them.
[From The New Testament in Braid Scots William Wye Smith (1904) here]
Subscribe to: Post Comments (Atom)
Post a Comment